Nürnberg StA, B-Laden-Akten, S I L 205 Nr. 2, unfol. (Ausf.); DV: Ir kgl. Mt. wolle mit zweyen iren geliebten sonen den yetzigen alhie angesetzten reichstag eigner person besuchen. E[mpfg. Nürnberg] 20. Decembris 1542.

Nachdem wir gnedigclich endtschlossen sein, sambt unsern zwayen eltisten geliebten sonen2, Ehgg. zu Österreich, den furgenomnen reichstag zu Nuernberg zu besuechen und gar in wenig tagen unser raiss von hinnen den negsten hinaufwerths zue tzu nemen und aber erinnert werden, das wir in der veste zu Nuernberg fur unser person und bemelte unsere geliebte sone, unser officier und hoffgesind, so wir bey uns bedurftig, mit zuegerichten zimmern nicht gnuegsamblich versehen sein, haben wir unsern getreuen lieben Lewpolden Heyperger, unsern chamerforier, in aller eil abgefertigt und ime aufgelegt und bevolhen, die zimmer daselbst fur uns und bemelte unser geliebte sone nodturftigclich zuerichten ze lassen3.

Und ist darauf unser sonder gnedigs ansynnen und begern an euch, ir wellet gemeltem unserm chamerfurier in seiner werbung volkomenlichen glauben geben und euch darauf dermassen guetwillig und wilfarig ertzaigen, halten und verordnung thun, das die gepeu und zuerichtung der zimer bemelts unsers chamerfuriers anzaigen nach in aller eil und noch vor unser ankonft geen Nuernberg beschehe, wie wir dann nicht zweifl tragen, ir solichs uns zu underthenigistem gefallen gantz guetwilligclich zu thun genaigt sein werdeth. Das wellen wir gegen euch und gemainer stat in gnaden erkhennen und bedenckhen und ir thuet daran unsern gefelligen willen und maynung.