Dresden HStA, 10024 GA, Loc. 10183/06, Instruction auf den gegen Regensburg angesetzten Reichstag und andere [...], fol. 40r–41v (Konz.); ÜS v. a. Hd. fol. 40r: Handlung der session anno etc. 41.

Euer röm. ksl. Mt. vorordenten comissarien haben wir jungst mundtlich, auch schriftlich vorbracht, welchergestalt es der session halben zwuschen den churfurstlichen heußern Phaltz und Sachssen herkomen und nemlichen, das der eldiste furste derselbigen heußer in reichsstande und session den vortrit gehabt und die andern wechselsweyße gesessen, das es auch also bei leben Hg. Albrechts und vulgende Hg. Georgen zcu Sachssen hochloblicher gedechtnus gehalten, wi dan des in der ubergebenen schrift vil felle angezceigt, und dieweil dan Hg. Haynrich zcu Sachssen, unser gnediger herr, under allen fursten obberurter beydera churfurstlichen heußer itzo der eldist ist, haben wir uns vorsehen, euere röm. ksl. Mt. werde genedigst einsehung gethan haben, dormit sein fstl. Gn., b –dergleichen auch Hg. Johans Ernst zcu Sachssen–b bey irer geburlichen session, inmassen solchs bey ihrer fstl. Gn. vorfarn und brudern herkommen, auch weren gehanthabt worden. Wir wissen aber euerer ksl. Mt. nicht zcu vorhalten, das sich c – Hg. Wilhelms, auch anderer–c fursten von Peyern rete heutiges tags abermals understanden, uns von wegen hochbenanter unserer gnedigen hern an yrer geburenden session zcu vorhindern1. Dan nachdeme wir uns derselbigen ordentlich session gehalden, ist Hg. Wilhelms rat Dr. Eck an einem andern ort aufgestanden und sich uber uns gesezt. Deme haben auch ezliche andere peyerische gesanten gevolget und sich, alle beynenander zcu sizen, angemast zcu lauterer neuerung, dan wir halten es dorvor, das kein unparteiischerd man sey, der sagen wirt, das solchs also vor alders herkomen, dan es haben sich die Hgg. von Peyern und auch irer fstl. Gn. gesanten des also hibevor nihe angemast, ane wes sich ire fstl. Gn. itzo, nemlich wi wir horen zcur neuerung und vormeinlicher vordruckung des haußes zcu Sachssen gerechtikeyt, voreyniget haben sollen.

Dieweil wir aber durch solch neuerlich vornemen als die gesanten hochgedachtere unserer gnedigen herrn aus deme furstenrat gedrungen, do uns dan als den dynern nicht geburen will, mit begebung irer fstl. Gn. gerechtikeyt zcu sitzen, und aber euere röm. ksl. Mt. genedigst zcu erachten, obwolh hochermelte unsere gnedigen herren zcu allem euerer ksl. Mt. unde deme hl. reich geburenden gehorsam ganz underthenigst gewilliget, f –das doch iren fstl. Gn. –f zcum beschwerlichsten fallen wil, dasjenigeg, ßo yr fstl. Gn. aber [= oder] derselbig gesanten aus unschidlicher vorhinderung der beyerischen reteh nicht konnen aber mogen neben andern beratschlagen, zcu leisten, zcu tragen und zcu volstrecken helfen. so bytten wir zcum underthenigisten, euere röm. ksl. Mt. wolle ane lengern aufzugk solche beschwerung abwenden und uns anstat beyderi unserer gnedigen herren bey yrer fstl. Gn. und derselbigen vorfarn althergebrachten session schuzen und hanthabenj, damit wir neben andern des reichs obligende sachen mogen beratschlagen helfen und durch obberurten, neuerlichen wegk dorvon nicht gedrungen werden, k –dan dis wolt unseren gnedigen herren in die lenge und dergestalt untreglich sein–k. Datum Regensburgk, Freyttags am tage Marie Magdalene im 41. jhare.